Mun Mogginn fara að "ganga erinda" einhvers?

 

Ég var kominn með svolitlar áhyggjur af örlögum Moggans og er bara glaður yfir því að hann sé búinn að fá kaupendur. Mér hefði þótt slæmt ef hann hefði rúllað. Hann er þrátt fyrir allt bezta dagblaðið og hefur verið eftir að hann hætti að vera málgagn Flokksins. Segja má að hann sé eftir öll þessi ár orðinn hluti af manni sjálfum, kannski annar handleggurinn, og þá að sjálfsögðu sá hægri. A.m.k. er ég farinn að skrifa aftur zetu!

Auðvitað hefur hann oft gert í bólið sitt og lagzt lágt. Hann gat ekki hamið hatur sitt á forsetanum ÓRG eða leynt því, t.d. á síðustu forsetakosningum, og né á Jóni Ásgeiri og Bónus. Hann lét sig hafa það að reyna að móta almenningsálitið í miðjum klíðum á meðan réttað var einn góðan gang um Bónus, með því að senda Agnesi Braga vestur um haf til Jóns Sullenberger til að mæra hann og lofsyngja í tveggja blaða opnugreinum, svo að sjaldan eða aldrei hafði sézt annað eins, og  sýna þjóðinni hvað þetta væri nú góður og heiðríkur strákur. Þetta gekk svo á mis við hlutlausa blaðamennsku að ég sagði Mogganum upp.

Ekki er hægt að bera á móti því að fráhvarfseinkenni voru með þeim hætti að ég endaði með því að gerast aftur áskrifandi. Því er hann nú skráður á aðalstjórnandann á mínu heimili, konuna mína.

Mér hefur líka sárnað fyrir hans hönd. Sínkt og heilagt hafa menn verið að klifa á því og væla, að öll pressan væri í höndum fárra auðmanna. Allir blaðamenn aðrir en hjá Mogganum "gengu erinda Bónusveldisins".  Sannleikurinn skýr og tær fengi ekki að koma upp á yfirborðið fyrir vikið. En hvað með Moggann? Var hann slíkur aumingi að hann gæti ekki borið þessum sannleika vitni. Var hann svona lítilssigldur?  Öll þessi klifun virtist ganga útfrá því að hann væri bara ekki til. Þá sárnaði mér nú aðeins.

Ég gef ekki mikið í það að kannanir bendi til þess að Fréttablaðið sé meira lesið en Mogginn. Hvenær lesa menn blöð? Hirða þau upp úr bunkum í einhverju stigahúsi og líta á forsíðuna. Fá það óbeðið innum bréfalúguna. Fbl er alls staðar. Og fyrir utan innantóma lífsstílsþætti, nokkuð góða leiðara og fasta greinarhöfunda af og til en kæfandi magn auglýsinga, er lítið annað þar að finna. Lesið? Blaðar fólk mikið til að horfa á allar þessar auglýsingar?

Mogginn hefur stundum verið betri en uppá síðkastið. Samt er hann langframbærilegastur dagblaða hér og hefur farið batnandi. Og þrátt fyrir margvísleg glappaskot og furður, eða kannski vegna þeirra, þykir mér vænt um hann og vona að hann fái að lifa án þess að þurfa að "ganga erinda" auðjöfra eða  Bónusveldisins einsog leit útfyrir á tímabili.

Í því máli hef ég hinsvegar blendnar tilfinningar. Eftir söluna virðist óumflýjanlegt að hann muni ganga einhvers erinda í augum þeirra, sem litið hafa blaðamennsku í slíku ljósi. Kannski erinda Bónusveldisins eftir allt saman? Það er þó fyrrum framkvæmdastjóri þess, sem fer fyrir flokki kaupenda. En kannski langar hann til að ná sér niðri á því einhverra hluta vegna.

Allavega eru kvótalénsherrar fyrirferðarmiklir í kaupendahópnum. Gefur ekki augaleið að þeir muni skipta sér að efnisvali, svona skv. eigin hugmyndafræði varðandi önnur dagblöð? Gæti verið að þeir færu að búa til skoðanakannanir um kvótakerfið og niðurstöður? Nú er að sjá til. Hingað til hefur Mogginn birt álit sitt gegn því af festu. Ef þeir þar á bæ halda því fram að þeir muni nú að sjálfsögðu gæta blaðamannsheiðurs síns og láta engan stýra sér, þá ætti Mogginn að hætta að klifa á því að allir aðrir blaðamenn séu að "ganga erinda" Baugsveldisins.

 

 

 

Athugasemdir

[Númi (IP-tala skráð) 2.3.2009 kl. 22:55]

Það segir sig sjálft , að niðursveifla í gæðum Morgunblaðsins er framundan.Þessir aðilar sem eru að taka Moggan yfir munu handstýra og ritskoða blaðið og nota það sem áróðurspistil,takið eftir í kosningunum sem framundan eru.Ég hef það á tilfynningunni að ég fari að segja blaðinu upp eftir 35,ára áskrift,svo sannfærður er ég um niðurhrun þess.Það er athyglisvert að ástralski auðmaðurinn sem bauð á móti þessum hópi,hvarf hljóðlaust af landi brott,var hann leppur fyrir nýju eigendurna.?Fyrir hverja var hann leppur,eða var þetta trix hjá klíkunni sem nú á ´´Moggan,,?Allt mjög dularfullt,Fór Óskar Magnússon fremstur  í flokki´´leikstjóranna.?Var þetta allt löngu planlagt.?